Қордайлық диқандар Шу жерінде табысты еңбек етуде

Көктемде Жамбыл облысының Қордай ауданынында дәстүрлі түрде көкөніс дақылдарын өсірумен айналысатын дүнген отбасылары Шу ауданына аттанған болатын. Шу ауданына жұмыс сапары барысында Жамбыл облысының әкімі Бердібек Сапарбаев фермер Лұқмар Сандуров пен тағы екі отбасының егіс алқаптарына атбасын бұрды.

Қордай ауданынан аттанған шаруалар 150 гектар жерге пияздың «Манас» сортын өсіруде.
Масаншы ауылының тұрғындары магистралды каналдың жағасына қуатты сорғыш пен су резервуарын орнатып, сол арқылы тамшылатып суару әдісін қолданып отыр. Диқаншылардың айтуынша, биыл олар бір гектардан кем дегенде 80 тоннадан пияз жинауға ниетті. Өнімін еліміздің әр аймақтарына жеткізбек.
Айта кету керек, биыл Қордай ауданынан 467 дүнген отбасы Шуға келіп, егіс жұмыстарын жүргізу үшін 8300 гектардан астам жер алған. Қордай ауданындағы қайғылы оқиғалардан кейін кейбіреулер дүнген ағайынның іскерлік белсенділігіне қатысты теріс болжам жасаған болатын.
Бірақ, бүгінгі таңда бұл еңбекқор халықтың өкілдері өздерінің сүйікті ісімен айналысып, құнарлы Шу өңірінде егістік жұмыстарын сәтті жүзеге асыруда.
Бердібек Сапарбаев Л.Сандуровқа пияз өсімінің жақсы жағдайы үшін ризашылығын жеткізіп, қолданылған тыңайтқыштың сапасы, жұмылдырылған еңбек күші мен жалақы мөлшері туралы сұрады.
Сонымен қатар, өнімді келесі көктемге дейін шығынсыз сақтап отыру үшін қолайлы қойма салуға кеңес берді.

Сайын ТҰРЛЫХАН,
Шу ауданы

Добавить комментарий

Ваш e-mail не будет опубликован. Обязательные поля помечены *